Logo - Agriturismo La Stala Mezzovico

La storia

La storia dala Palazzina la cumincia in dal 1891, quand in dala cà vegia (pöö diventaat risturant dala palazzina) adibiit a stalazz, var a dii ul servizi dal cambi di cavai, l’eva in piena attività.

In quel periodo lì ieva però i donn a faac adré ai client, e gheva l’obblig da tegnii sul fuguraa ul caffè da dag a gratis ai pustiglion.

Pöö in di ann 40/50 dal secul pasaat la nona Pierina, ciamada barbisa par via che la gheva i barbiis vistuus, che la gà faseva ammò dré ala so vaca che la ciamava Müchet, ul fiöö Ignazio detto Gnazin al incumenciava con ul cumercio di besti con una spicada predilezion par i cavai.

A quel temp lì i cumerciant da bestiam i gheva un codice par vestis, con gilet, camisa, capell e duveva mai mancaa ul foulard, ingropaat cumè dumà luur ieva bon da faa, par distinguas e ricunosass, i gniva ciamaat bastrozz o bastrozzon.

In dal 1969, più o men, l’esigenza da ingrandii la strada cantunal la fai sì che i vecc stall i vegnisan trai giò, e quindi ul Gnazin cun ul so fiöö pusee grand, ul Lüiis in dal 1971 i cumenciava la custruzion dala stala növa par 20 vacc, 2 cavai e 6 purscei.

Ma la famiglia Coldesina la gheva miga dumà a che faa cun ul bestiam, ma anca l’usteria dala Palazzina, e lì lavurava la dona dal Gnazin, la Margherita, mei cunusüda come la Mutti par via di so urigin svizzer tudesc. Lè staia lee sicuramente a trasmett la passion dala cüsina e par ul vin bon al fiöö Guerin, diventaat cul temp un cööc cugnusüt in dal panorama gastrunomic dal Tesin.

Essendo però una famiglia ala vegia, tücc i duveva contribüii al funzionament dala stesa, ognün cun ul so dafaa, la tüsa Emmy la faseva la camerera, ul Guerin in cüsina e ul Lüiis e ul Tino in stala.

Cun ul pasaa dal temp i cambiament i cuminciava a fass sentii, suratütt in agricoltüra e quindi ul Lüiis al sè adeguaat  e in fal 1974 la metüü su ditta da trasport e scaaf, persona d’una simpatia incredibil, lè vegnuut a mancaa tropp presct a l’età da 36 ann, lasando indrè la Delia e ul sò fiörett Aldo.

A stu punto ul Tino la decidüüt da naa innanz cun la passion pai besti e la cumpraat la stala dala veduva dal sò fradell, nando innanz cun l’azienda agricola sepür in manera ridota, fasendo düü mestee, paesan e pitur. Un grand aiüt u ghè stai dai dal so grand amiis Ivo ciamaat Lupo; e in dal fratemp imparando l’arte da faa su i purscei cun la mazza in cà e preparaa la salümeria nustrana, cun un süport determinant dal poro Roby zocchi.

Ma in dal 1993 un altro lütto u rivava in dala famiglia Coldesina, infatti la dona dal Tino, la Nadia tüsa du Scalfalin da Bironic, la lasava ul so omm e i adüraat Andrea e Ramona. Lè stai un culpo düür par ul moral, ma cun ul so carater indomito al sé miga lasaat naa e lè nai innanz cun l’azienda agricola, e ul so bestiam lè stai quel che gà dai la forza da miga molaa e naa innanz, tanto che la ciapaat anca l’alp da Farè (Alpett da Sigirin).

In dal 2000 la Paola la fai ul so ingress in dala vita dal RenaTino, che cun ul so carater tranquill e pacaat lè riuscida  a daa nöf mutivazion, migliorando la gestion e l’urganizzazion dala azienda.

Un quai ann dopo da conseguenza i sé spusaat cun l’appruvazion di fiöö e quindi con rinuvaat entusiasmo, pasin pasin, l’azienda la cumenciaat a sübii picui ma custant cambiament e migliurii.

Cun la necessità di nööf normi e regul par la tegnuda di besti ul vecc ricover lè restaat inütilizzat, da chi l’idea da trasfurmal in agriturismo.

Ul prugett a ghé stai dai al neuut, fiöö du poro Lüiis, Aldo diventaat architett, che la fai diventaa chesta idea in realtà. Ala trasfurmazion anca ul cügnaat Rico, Pà dal Massimo (Toto) lè stai fundamental pala bona riuscida da chel’idea chi.

In dal 2021 ul Toto avendo otegnüüt ul diploma da agricultuur l’ha ritiraat sia l’azienda che i stabiil, nando innanz cun na storia incumenzada tanti ann fa.

Determinant lè staia anca la decision dala Patrizia, so cumpagna da vita, da sustegnii  e cundiviid questa ennesima sfida.

Lè quindi cun urgoglio, dopo tanti strapazz, che presentum incöö l’azienda agricola,agriturismo e scuderia La Stala Sagl, in dua ufrisum i noss prudott e chii dala region, in un ambient particular ricavaat dala vegia stala di vacc, cun l’ubietif da faf pruvaa e rivif chii sensazion, i güst, i valuur e i emuzion d’una volta, ul tütt cundiit da alegria e l’umiltà che da sempro i ga accumpagna.

 

Toto e Patty 

L’Agriturismo La Stala è aperto

Mercoledì - Sabato 11:00 - 14:30 / 17:00 - 23:00

Domenica 11:00 - 16:00

Lunedì e martedì chiuso